Kanupriya (Ansh 4) - Samudra Swapna

jis kee sheShashayyaa par
tumhaare saath yug-yugon tak kreeḌaa kee hai
          aaj us samudr ko mainne svapn men dekhaa kanu!


laharon ke neele avaguNThan men
jahaa(n) sindooree gulaab jaisaa sooraj khilataa thaa
vahaa(n) saikaḌon niShphal seepiyaa(n) chhaTapaTaa rahee hai
          - aur tum maun ho
mainne dekhaa ki agaNit vikShubdh vikraant laharen
phen kaa shirastraaN pahane
sivaar kaa kavach dhaaraN kiye
nirjeev machhaliyon ke dhanuSh liye
yuddhamudraa men aatur hain
              - aur tum kabhee madhyasth ho
                            kabhee taTasth
                            kabhee yuddharat


aur main ne dekhaa ki ant men tum
thak kar
in sab se khinn, udaaseen, vismit aur
kuchh-kuchh aahat
mere kandhon se Tik kar baiTh gaye ho
aur tumhaaree anamanee bhaTakatee u(n)galiyaa(n)
taT kee geelee baaloo par
kabhee kuchh, kabhee kuchh likh detee hain
          kisee upalabdhi ko vyakt karane ke abhipraay
                                          se naheen;
          maatr u(n)galiyon ko ThaNDe jal men Dubone kaa
          kShaNik sukh lene ke lie!

aaj us samudr ko mainne svapn men dekhaa kanu!

viSh bhare phen, nirjeev soory, niShphal seepiyaa(n), nirjeev machhaliyaa(n) ......
- laharen niyantraNaheen hotee jaa rahee hain
  aur tum taT par baa(n)h uThaa-uThaa kar kuchh kahe jaa rahe ho
  par tumhaaree koee naheen sunataa, koee naheen sunataa!


ant men tum haar kar, lauT kar, thak kar
mere vakSh ke gaharaav men
apanaa chauḌaa maathaa rakh kar
gaharee neend men so gaye ho .....
aur mere vakSh kaa gaharaav
samudr men bahataa huaa, baḌaa-saa taajaa, kvaa(n)raa, mulaayam, gulaabee
                                    vaTapatr ban gayaa hai
          jis par tum chhoTe-se chhaune kee bhaanti
          laharon ke paalane men mahaapralay ke baad so rahe ho!

          neend men tumhaare hoTh dheere-dheere hilate hain
          "svadharm! ........ aakhir mere lie svadharm kyaa hai?"
          aur laharen thapak de kar tumhe sulaatee hain
          "so jaao yogiraaj .... so jaao ..... nidraa
                                          samaadhi hai!"

          neend men tumhaare hoTh dheere-dheere hilate hain
          "nyaay-anyaay, sad-asad, vivek-avivek -
          kasauTee kyaa hai? aakhir kasauTee kyaa hai?"
          aur laharen thapakee de kar tumhen sulaa detee hain
          "so jaao yogeshvar ........ jaagaraN svapn hai,
                                chhalanaa hai, mithyaa hai!"


tumhaare maathe par paseenaa jhalak aayaa hai
aur honTh kaa(n)p rahe hain
aur tum chaunk kar jaag jaate ho
aur tumhen koee bhee kasauTee naheen milatee
aur jue ke paa(n)se kee tarah tum nirNay ko phenk dete ho
                        jo mere paitaane hai vah svadharm
          jo mere sirahaane hai vah adharm ........
          aur yah sunate hee laharen
          ghaayal saa(n)pon-see lahar lene lagatee hai
          aur pralay phir shuroo ho jaataa hai


aur tum phir udaas ho kar kinaare baiTh jaate ho
aur viShaadapoorN dRShTi se shoony men dekhate hue
kahate ho - "yadi kaheen us din mere paitaane
duryodhan hotaa to ..................... aah
is viraaT samudr ke kinaare o arjun, main bhee
abodh baalak hoo(n)!


          aaj mainne samudr ko svapn men dekhaa kanu!

taT par jal-devadaaruon men
baar-baar kaNTh kholatee huee havaa
ke goo(n)ge jhakore,
baaloo par apane pagachinh banaane ke karuN prayaas men
baisaakhiyon par chalataa huaa itihaas,
...... laharon men tumhaare shlokon se abhimantrit gaaNDeev
gale hue sivaar-saa utaraa aayaa hai ......
            aur ab tum taTasth ho aur udaas


samudr ke kinaare
naariyal kaa kunj hai
aur tum ek booḌhe peepal ke neeche chupachaap baiThe ho
          maun, parishamit, virakt
          aur pahalee baar jaise tumhaaree akShay taruNaaee par
          thakaan chhaa rahee hai!


aur chaaron or
ek khinn dRShTi se dekh kar
ek gaharee saa(n)s lekar
tum ne asaphal itihaas ko
jeerNavasan kee bhaa(n)ti tyaag diyaa hai


          aur is kShaN
          keval apane men Doobe hue
          dard men pake hue
          tumhen bahut din baad meree yaad aayee hai!

kaa(n)patee huee deep lau jaise
peepal ke patte
ek-ek kar bujh gaye

          utarataa huaa a(n)dhiyaaraa ......


samudr kee laharen
ab tumhaaree phailee huee saa(n)varee shithil baa(n)hen hain
bhaTakatee seepiyaa(n) tumhaare kaa(n)pate adhar


aur ab is kShaN tum
keval ek bharee huee
pakee huee
gaharee pukaar ho ..........


          sab tyaag kar
          mere lie bhaTakatee huee ......
- Dharmveer Bharati
Recited by: Vani Murarka
Kanupriya - Dharmaveer Bharati
Published by: Bharatiya Jnanpith
18, Institutional Area, Lodi Road,
New Delhi - 110 003

***
Dharmveer Bharati
's other poems on Kaavyaalaya

 Kanupriya (Ansh 1) - Aamra Baur Kaa Geet
 Kanupriya (Ansh 2) - Vipralabdhaa
 Kanupriya (Ansh 3) - Usee Aam Ke Neeche
 Kanupriya (Ansh 4) - Samudra Swapna
 Kanupriya (Ansh 5) - Samaapan
 Kyonki
 Gunaah Kaa Geet
 Chaandanee Jagaatee Hai
 Shaam: Do Manah Stithiyaan
This Month
'Koyal Kaa Sitaar'
Ashok Chakradhar


ek baar vah uḌate uḌate,
uḌate hee uḌate mastee men,
jangal ke kuchh baahar aakar,
pahu(n)chee anajaanee bastee men.

bastee men Teele ke oopar,
sundar saa ik chhoTaa ghar thaa,
goo(n)j rahaa sangeet jahaa(n) par,
laharaataa sitaar kaa svar thaa.

jaise koee jaadoo kar de,
jaise chumbak lohaa kheenche,
us sitaar kee svaralaharee se,
khinchakar koyal aaee neeche.
..

Read and listen here...
Next post on
Friday 16 November

To receive an email notification
Subscribe
संग्रह से कोई भी कविता | काव्य विभाग: शिलाधार युगवाणी नव-कुसुम काव्य-सेतु | प्रतिध्वनि | काव्य लेख
आपकी कविता | सम्पर्क करें | हमारा परिचय

a  MANASKRITI  website