Pitaa: Wah kyon nahi ruke

mere lie, mere pitaa
tumhaare lie, tumhaare pitaa jaise naheen hain,

ekaant kee khoh men jab jaataa hoo(n)
bilkul, bilkul kareeb ho jaataa hoo(n)
apane hee
tab bhee j़rooree naheen ki
pitaa kee yaad aa jaaye.

aasamaan kee or takoo(n)
to dikhaaee de jaaye unakaa aks
aisaa bhee naheen hotaa

vah dikhaaee dete hain mujhe kabhee beTee men
jab vah mujhase kahatee hai ki
paapaa aap Tahalane jaayaa karo
jaldee jaagakar.

maa(n) kahatee hai ki beTee ko
khoob paDhaao to vah
yaad aa jaate hain

bahut vRddh jan milate hain to
sochataa hoo(n) ki vah kyon naheen ruke?
aise hone ke lie.

pitaa kabhee bhee kaundh jaate hain
par is vak़t naheen
jab main unako khoj rahaa hoo(n)

itanaa hee yaad hai ki
jab vah kabhee bhee ekadam chamakate hain
yaad banakar, to main
chaunk jaataa hoo(n) aur bahut der tak
yahee sochataa rahataa hoo(n) ki
kitanaa sukhad hotaa hai pitaa kaa
jeevan bhar saath rahanaa.

Topic: