...... kyonki sapanaa hai abhee bhee -
isalie talavaar TooTe, ashv ghaayal
kohare Doobee dishaayen,
kaun dushman, kaun apane log, sab kuchh dhundh-dhoomil,
kintu kaayam yuddh kaa sankalp hai apanaa abhee bhee
...... kyonki hai sapanaa abhee bhee!
toḌ kar apane chaturdik kaa chhalaavaa
jabaki ghar chhoḌaa, galee chhoḌee, nagar chhoḌaa,
kuchh naheen thaa paas bas isake alaavaa,
vidaa belaa, yahee sapanaa bhaal par tumane tilak kee tarah aa(n)kaa thaa
(ek yug ke baad ab tumako kahaan yaad hogaa)
kintu mujhako to isee ke lie jeenaa aur laḌanaa
hai dhadhakatee aag men tapanaa abhee bhee
...... kyonki sapanaa hai abhee bhee!
tum naheen ho, main akelaa hoo(n) magar
yah tumhee ho jo
TooTatee talavaar kee jhankaar men
yaa bheeḌ kee jayakaar men
yaa maut ke sunasaan haahaakaar men
phir goonj jaatee ho
aur mujhako
Dhaal chhooTe, kavach TooTe hue mujhako
phir yaad aataa hai ki
sab kuchh kho gayaa hai - dishaae(n), pahachaan, kunDal-kavach
lekin sheSh hoo(n) main, yuddharat main, tumhaaraa main
tumhaaraa apanaa abhee bhee
isalie, talavaar TooTee, ashv ghaayal,
kohare Doobee dishaae(n),
kaun dushman, kaun apane log, sab kuchh dhundh-dhoomil
kintu kaayam yuddh kaa sankalp hai apanaa abhee bhee
...... kyonki sapanaa hai abhee bhee!
