bakson men band hain yaaden
har kapaḌaa ek yaad hai
jise tumhaare haathon ne tah kiyaa thaa
dhobee ne dhote samay in ko ragaḌaa thaa
peeTaa thaa
mail kaT gayaa par ye n kaTeen
yah aur andar chalee gayeen
ham ne nirmam hokar inhen utaar diyaa
inhonne kuchh naheen kahaa
par har baar
ye hamaaraa kuchh ansh le gayeen
jise ham jaan n sake
tvachaa se in kaa jo sambandh hai vah rakt tak hai
rakt kaa saaraa ubaal inhonne sahaa hai
inhen khol kar dekho
in men hamaare khoon kee khushaboo zaroor hogee
abhee ye maun hai
par in kee ek-ek parat men jo man chhipaa hai
vah hamaare jaane ke baad bolegaa
yaaden aadamee ke beet jaane ke baad hee bolatee hain
bakson men band rahane do inhen
jab pooree phurasat ho tab dekhanaa
in kaa vaartaalaap baḌaa eerShyaaloo hai
kuchh aur naheen karane degaa.
