maathe men sendoor par chhoTee do bindee chamacham-see,
papanee par aa(n)soo kee boo(n)den motee-see, shabanam-see.
ladee huee kaliyon men maadak Tahanee ek naram-see,
yauvan kee vinatee-see bholee, gumasum khaḌee sharam-see.
peelaa cheer, kor men jisakee chakamak goTaa-jaalee,
chalee piyaa ke gaanv umar ke solah phoolonvaalee.
pee chupake aanand, udaasee bhare sajal chitavan men,
aa(n)soo men bheengee maayaa chupachaap khaḌee aangan men.
aa(n)khon men de aa(n)kh heratee hain usako jab sakhiyaa(n),
muskee aa jaatee mukh par, ha(n)s detee rotee a(n)khiyaa(n).
par, sameT letee sharamaakar bikharee-see muskaan,
miTTee ukasaane lagatee hai aparaadhinee-samaan.
bheeng rahaa meeThee umang se dil kaa konaa-konaa,
bheetar-bheetar ha(n)see dekh lo, baahar-baahar ronaa.
too vah, jo jhuramuT par aayee ha(n)satee kanak-kalee-see,
too vah, jo phooTee sharaab kee nirjhariNee patalee-see.
too vah, rachakar jise prakRti ne apanaa kiyaa singaar,
too vah jo dhoosar men aayee subaj rang kee dhaar.
maan kee DheeTh dulaar! pitaa kee o lajavantee bholee,
le jaayegee hiy kee maNi ko abhee piyaa kee Dolee.
kaho, kaun hogee is ghar tab sheetal ujiyaaree?
kise dekh ha(n)s-ha(n)s kar phoolegee sarason kee kyaaree?
vRkSh reejh kar kise karenge pahalaa phal arpaN-saa?
jhukate kisako dekh pokharaa chamakegaa darpaN-saa?
kisake baal oj bhar denge khulakar mand pavan men?
paḌ jaayegee jaan dekhakar kisako chandr-kiran men?
maha(n)-maha(n) kar manjaree gale se mil kisako choomegee?
kaun khet men khaḌee fasal kee devee-see jhoomegee?
banee phiregee kaun bolatee pratimaa hariyaalee kee?
kaun rooh hogee is dharatee phal-phoolon vaalee kee?
ha(n)sakar hRday pahan letaa jab kaThin prem-zanjeer,
khulakar tab bajate n suhaagin, paa(n)von ke manjeer.
ghaḌee ginee jaatee tab nishidin u(n)galee kee poron par,
priy kee yaad jhoolatee hai saa(n)son ke hinDoron par.
palatee hai dil kaa ras peekar sabase pyaaree peer,
banatee hai bigaḌatee rahatee putalee men tasveer.
paḌ jaataa chaskaa jab mohak prem-sudhaa peene kaa,
saaraa svaad badal jaataa hai duniyaa men jeene kaa.
mangalamay ho panth suhaagin, yah meraa varadaan;
harasingaar kee Tahanee-se phoolen tere aramaan.
jage hRday ko sheetal karanevaalee meeThee peer,
nij ko Dubo sake nij men, man ho itanaa ganbheer.
chhaayaa karatee rahe sadaa tujhako suhaag kee chhaa(n)h,
sukh-dukh men greevaa ke neeche ho priyatam kee baa(n)h.
pal-pal mangal-lagn, zindagee ke din-din tyauhaar,
ur kaa prem phooTakar ho aa(n)chal men ujalee dhaar.
