ghere thaa mujhe tumhaaree saa(n)son kaa pavan,
jab main baalak abodh anajaan thaa.
yah pavan tumhaaree saa(n)s kaa
saurabh laataa thaa.
usake kandhon par chaḌhaa
main jaane kahaa(n)-kahaa(n)
aakaash men ghoom aataa thaa.
sRShTi shaayad tab bhee rahasy thee.
magar koee paree mere saath men thee;
mujhe maaloom to n thaa,
magar taale kee koonjee mere haath men thee.
javaan ho kar main aadamee n rahaa,
khet kee ghaas ho gayaa.
tumhaaraa pavan aaj bhee aataa hai
aur ghaas ke saath aThakheliyaa(n) karataa hai,
usake kaanon men chupake chupake
koee sandesh bharataa hai.
ghaas uḌanaa chaahatee hai
aur akulaatee hai,
magar usakee jaḌen dharatee men
betarah gaḌee hueen hain.
isalie havaa ke saath
vah uḌ naheen paatee hai.
shakti jo chetan thee,
ab jaḌ ho gayee hai.
bachapan men jo kunjee mere paas thee,
umr baḌhate baḌhate
vah kaheen kho gayee hai.
