aaj phir shaam huee aur tum naheen aaye
aasamaan kee laal bindee
chhoone chalee bhauhen kShitij kee
aur kuchh jhonke havaa ke
Dheron bheege pal le aaye
par tum naheen aaye
chal paḌaa ye man achaanak
phir usee peḌ ke neeche se guzaraa
kuchh sookhe patte paḌe the neeche
aur ek pahachaanee khushboo aa lipaTee
vaisaa hee ek pattaa kabase mere
sapanon ke paas rakhaa hai
kabhee ret kee sookhee aa(n)dhee men
jaane kyon machal uThataa hai
uḌataa hai gol gol aur
us khushboo se jaa ulajhataa hai
jaise ulajhaa karate the kabhee
jhooThee kahaaniyon pe ham bhee
aaj patte kyon chupachaap paḌe hain
kaise us khushboo ko samajhaayen
shaam vahee par tum naheen aaye
guzaraa abhee mere paas se ek kShaN
halkee see dastak de gayaa vo
gunagunaa rahaa thaa vahee dhun jisape
ham donon saath chale the kabhee
kitane besure lagate the tum
meraa sur ha(n)sataa thaa tum par
aaj bhee vo Dhu(n)Dh rahaa tumhen
ab kaise us sur ko samajhaayen
shaam huee tum kyon naheen aaye
