mere bahut paas
mRtyu kaa suvaas
deh par us kaa sparsh
madhur hee kahoo(n)gaa
us kaa svar kaanon men
bheetar magar praaNon men
jeevan kee lay
tarangit aur uddaam
kinaaron men kaam ke ba(n)dhaa
pravaah naam kaa
ek dRshy subah kaa
ek dRshy shaam kaa
donon men kShitij par
sooraj kee laalee
donon men dharatee par
chhaayaa ghanee aur lambee
imaaraton kee vRkShon kee
dehon kee kaalee
donon men kataaren panchhiyon kee
chup aur chahakatee huee
donon men raasheeyaa(n) phoolon kee
kam-jyaadaa mahakatee huee
donon men
ek tarah kee shaanti
ek tarah kaa aaveg
aa(n)khen band praaN khule hue
aspaShT magar dhule huai
kitane aamantraN
baahar ke bheetar ke
kitane adamy iraade
kitane ulajhe kitane saade
achchhaa anubhav hai
mRtyu maano
haahaakaar naheen hai
kalarav hai!
