thakee dupaharee me(n) peepal par,
kaag bolataa shoony svaro(n) me(n),
phool aaKhiree ye basant ke
gire greeShm ke ooShm karo(n) me(n)
dheevar kaa soonaa svar uThataa
tapee ret ke door taTo(n) par
halkee-garam havaa reteelee
jhuk chalatee soone peḌo(n) par.
ab ashok ke bhee thaale me(n)
Dher-Dher patte uḌate hai(n),
ThiThakaa-nabh Doobaa hai raj me(n)
dhool bharee nangee saḌako(n) par.
van-kheto(n) par hai soonaapan,
khaaleepan nishabd gharon me(n),
thakee dupaharee me(n) peepal par
kaag bolataa shoony svaron me(n).
yah jeevan kaa ekaakeepan--
garamee ke sunasaan dino(n) saa,
antaheen dopaharee Doobaa
man nishchal hai shuShk vano(n) saa.
Thahar gaee hai(n) cheele(n) nabh me(n),
Thahar gaee hai dhoop-chhaanh bhee,
shoony teesaraa pahar paas hai
jalate hue band nayano(n) saa.
kaun door se chalataa aataa,
in garameele mlaan patho(n) men,
thakee dupaharee me(n) peepal par
kaag bolataa shoony svaron me(n).
-
Girijakumar Mathur
