kalaaee se kaandhon tak aabhooShit
ek naaree kaa pratimaan
moan-jo-daaḌo men dabaa
meraa anakath sansaar
kyaa hoo(n) main ?
pannon men simaTaa
maatr ek yugeen vRttaant ?
khoyaa saaraa samarpit ateet
lakShmaN-rekhaa ke paar
agni bhee jalaa naa paayee
ek sanshay kaa taar
kyaa hoo(n) main ?
yug-yug se poShit maanas men
maryaadaa kaa prachaar ?
ichchhaa-praapti se sanlagn
aasheeSh men basaa shraap
sapt vachan ke upahaas se
bindhaa aatm-sammaan
kyaa hoo(n) main ?
dharm-yuddh par aaropit
murkh ahankaar kaa pratikaar ?
devee se daasee tak jhoolataa
ek anasulajhaa vichaar
sadee dar sadee sthaapit
maanavataa kaa sanskaar
kyaa hoo(n) main ?
baazaar ke anuroop badalataa
maatr ek utpaad ?
