Meree Mummy Kahtee Hain

chandaa kee dharatee par mujh see
sundar pariyaa(n) rahatee hain
main bhee vaheen se aayee hoo(n)
meree mammee kahatee hain.

mere bhee jab par ug aayen
chandaa par main jaaoo(n)gee
aasamaan ke paT par main bhee
taare khoob sajaaoo(n)gee
pariyon kee hoo(n) shahazaadee main
meree mammee kahatee hain
chandaa kee dharatee par mujh see
sundar pariyaa(n) rahatee hain.

seeḌhee Daaloo(n)gee oopar se
seedhe maa(n) kee god talak
jhaT-paT neeche aa jaaoo(n)gee
dheere-dheere sarak-sarak
yaad sataayegee jab ghar kee
meree mammee kahatee hain
chandaa kee dharatee par mujh see
sundar pariyaa(n) rahatee hain.

baadal par main sair ko jaaoo(n)
antarikSh ko chhoo loo(n)gee
taaron see jhilamil muskaanen
sabake mukh par gholoo(n)gee
maa(n) kee main laaḌo raanee hoo(n)
meree mammee kahatee hain
chandaa kee dharatee par mujh see
sundar pariyaa(n) rahatee hain.

Shikha Gupta
Email : [email protected]