priyatam mere,
sab bhinn bhinn bunate hain
guladaston ko,
bhaavanaaon se,
vichaaron se.
main tumhe bunoo(n)
apanee saa(n)son se.
bhaavanaayen sthir ho jaae(n),
vichaaradhaaraa bhee,
honTh bhee maun rahe -
aur har shvaas
nit tumhaaraa naam kahe -
aur tum bunate raho.
ek ghaḌee aaegee phir
meree band palakon ke sammukh
tum niraakaar saakaar hoge.
tum baa(n)hon men apanee,
meree saa(n)son ko sameT loge.
phir n hogaa milanaa,
n bichhaḌanaa, n janm-maraN,
n main.
sirph tum mere priyatam -
apanaa svaroop paakar -
anant.
