Tumhaare Saath Rahkar

tumhaare saath rahakar
aksar mujhe aisaa mahasoos huaa hai
ki dishaae(n) paas aa gayee hain,
har raastaa chhoTaa ho gayaa hai,
duniyaa simaTakar
ek aa(n)gan-see ban gayee hai
jo khachaakhach bharaa hai,
kaheen bhee ekaant naheen
n baahar, n bheetar.

har cheez kaa aakaar ghaT gayaa hai,
peḌ itane chhoTe ho gaye hain
ki main unake sheesh par haath rakh
aasheeSh de sakataa hoo(n),
aakaash chhaatee se Takaraataa hai,
main jab chaahoo(n) baadalon men mu(n)h chhipaa sakataa hoo(n).

tumhaare saath rahakar
aksar mujhe mahasoos huaa hai
ki har baat kaa ek matalab hotaa hai,
yahaa(n) tak ki ghaas ke hilane kaa bhee,
havaa kaa khiḌakee se aane kaa,
aur dhoop kaa deevaar par
chaḌhakar chale jaane kaa.

tumhaare saath rahakar
aksar mujhe lagaa hai
ki ham asamarthataaon se naheen
sambhaavanaaon se ghire hain,
har deevaar men dvaar ban sakataa hai
aur har dvaar se pooraa kaa pooraa
pahaaḌ guzar sakataa hai.

shakti agar seemit hai
to har cheez ashakt bhee hai,
bhujaae(n) agar chhoTee hain,
to saagar bhee simaTaa huaa hai,
saamarthy keval ichchhaa kaa doosaraa naam hai,
jeevan aur mRtyu ke beech jo bhoomi hai
vah niyati kee naheen meree hai.

Ref: Pratinidhi Kavitayen - Sarveshwardayal Saxena
Pub: Rajkamal Prakashan Private Limited.

Topic:

Love (63)

Marriage (8)

Relations (18)