yah simaTatee saa(n)jh,
yah veeraan jangal kaa siraa,
yah bikharatee raat, yah chaaron taraph sahamee dharaa;
us pahaaḌee par pahu(n)chakar roshanee patharaa gayee,
aaḳhiree aavaaz pankhon kee kisee ke aa gayee,
ruk gayee ab to achaanak lahar kee a(n)gaḌaaiyaa(n),
taal ke khaamosh jal par so gaee parachhaaiyaa(n).
door peḌon kee kataaren ek hee men mil gayeen,
ek dhabbaa rah gayaa, jaise zameenen hil gayeen,
aasamaa(n) tak TooTakar jaise dharaa par gir gayaa,
bas dhu(n)e ke baadalon se saamane path ghir gayaa,
yah a(n)dhere kee piTaaree, raastaa yah saa(n)p-saa,
kholanevaalaa anaaḌee man rahaa hai kaa(n)p-saa.
laḌakhaḌaane lag gayaa main, Dagamagaane lag gayaa,
deharee kaa deep teraa yaad aane lag gayaa;
thaam le koee kiran kee baa(n)h mujhako thaam le,
naam le koee kaheen se roshanee kaa naam le,
koee kah de, "door dekho TimaTimaayaa deep ek,
o a(n)dhere ke musaaphir usake aage ghuTane Tek!"
-
Sarveshwardayal Saxena
