kaun tum aruNim uShaa-see man-gagan par chhaa gayee ho!
lok dhoomil ra(n)g diyaa anuraag se,
maun jeevan bhar diyaa madhu raag se,
de diyaa sansaar sone kaa sahaj
jo milaa karataa baḌe hee bhaag se,
kaun tum madhumaas-see amaraaiyaa(n) mahakaa gayee ho!
veethiya(n) soone hRday kee ghoom kar,
nav-kiraN-see Daal baahen jhoom kar,
svapn-chhalanaa se pravanchit praaN kee
chetanaa meree jagaayee choom kar,
kaun tum nabh-apsaraa-see is tarah bahakaa gayee ho!
rikt unman ur-sarovar bhar diyaa
bhaavanaa-sanvedanaa ko svar diyaa,
kaamanaaon ke chamakate nav shikhar
pyaar meraa saty shiv sundar kiyaa,
kaun tum avadaat ree! itanee adhik jo bhaa gayee ho!
