jis-jis se path par sneh milaa, us-us raahee ko dhanyavaad.
jeevan asthir anajaane hee, ho jaataa path par mel kaheen,
seemit pag Dag, lambee manzil, tay kar lenaa kuchh khel naheen.
daae(n)-baae(n) sukh-dukh chalate, sammukh chalataa path kaa prasaad --
jis-jis se path par sneh milaa, us-us raahee ko dhanyavaad.
saa(n)son par avalambit kaayaa, jab chalate-chalate choor huee,
do sneh-shabd mil gaye, milee nav sphoorti, thakaavaT door huee.
path ke pahachaane chhooT gaye, par saath-saath chal rahee yaad --
jis-jis se path par sneh milaa, us-us raahee ko dhanyavaad.
jo saath n meraa de paaye, unase kab soonee huee Dagar?
main bhee n chaloo(n) yadi to bhee kyaa, raahee mar lekin raah amar.
is path par ve hee chalate hain, jo chalane kaa paa gaye svaad --
jis-jis se path par sneh milaa, us-us raahee ko dhanyavaad.
kaise chal paataa yadi n milaa hotaa mujhako aakul antar?
kaise chal paataa yadi milate, chir-tRpti amarataa-poorN prahar!
aabhaaree hoo(n) main un sabakaa, de gaye vyathaa kaa jo prasaad --
jis-jis se path par sneh milaa, us-us raahee ko dhanyavaad.
