sakhi, ve mujhase kahakar jaate,
kah, to kyaa mujhako ve apanee path-baadhaa hee paate?
mujhako bahut unhonne maanaa
phir bhee kyaa pooraa pahachaanaa?
mainne mukhy usee ko jaanaa
jo ve man men laate.
sakhi, ve mujhase kahakar jaate.
svayan susajjit karake kShaN men,
priyatam ko, praaNon ke paN men,
hameen bhej detee hain raN men -
kShaatr-dharm ke naate.
sakhi, ve mujhase kahakar jaate.
huaa n yah bhee bhaagy abhaagaa,
kisapar viphal garv ab jaagaa?
jisane apanaayaa thaa, tyaagaa;
rahe smaraN hee aate!
sakhi, ve mujhase kahakar jaate.
nayan unhen hain niShThur kahate,
par inase jo aa(n)soo bahate,
saday hRday ve kaise sahate?
gaye taras hee khaate!
sakhi, ve mujhase kahakar jaate.
jaayen, siddhi paaven ve sukh se,
dukhee n hon is jan ke dukh se,
upaalambh doo(n) main kis mukh se?
aaj adhik ve bhaate!
sakhi, ve mujhase kahakar jaate.
gaye, lauT bhee ve aavenge,
kuchh apoorv-anupam laavenge,
rote praaN unhen paavenge,
par kyaa gaate-gaate?
sakhi, ve mujhase kahakar jaate.
-
Maithilisharan Gupt
