Basanti Hawa

havaa hoo(n), havaa main
basantee havaa hoo(n).

        suno baat meree -
        anokhee havaa hoo(n).
        baḌee baavalee hoo(n),
        baḌee mastmaulaa.
        naheen kuchh phikar hai,
        baḌee hee niDar hoo(n).
        jidhar chaahatee hoo(n),
        udhar ghoomatee hoo(n),
        musaaphir ajab hoo(n).

n ghar-baar meraa,
n uddeshy meraa,
n ichchhaa kisee kee,
n aashaa kisee kee,
n premee n dushman,
jidhar chaahatee hoo(n)
udhar ghoomatee hoo(n).
havaa hoo(n), havaa main
basantee havaa hoo(n)!


        jahaa(n) se chalee main
        jahaa(n) ko gaee main -
        shahar, gaa(n)v, bastee,
        nadee, ret, nirjan,
        hare khet, pokhar,
        jhulaatee chalee main.
        jhumaatee chalee main!
        havaa hoo(n), havaa mai
        basantee havaa hoo(n).

chaḌhee peḌ mahuaa,
thapaathap machaayaa;
giree dhamm se phir,
chaḌhee aam oopar,
use bhee jhakoraa,
kiyaa kaan men 'koo',
utarakar bhagee main,
hare khet pahu(n)chee -
vahaa(n), genhu(n)on men
lahar khoob maaree.


        pahar do pahar kyaa,
        anekon pahar tak
        isee men rahee main!
        khaḌee dekh alasee
        lie sheesh kalasee,
        mujhe khoob soojhee -
        hilaayaa-jhulaayaa
        giree par n kalasee!
        isee haar ko paa,
        hilaaee n sarason,
        jhulaaee n sarason,
        havaa hoo(n), havaa main
        basantee havaa hoo(n)!

mujhe dekhate hee
araharee lajaaee,
manaayaa-banaayaa,
n maanee, n maanee;
use bhee n chhoḌaa -
pathik aa rahaa thaa,
usee par Dhakelaa;
ha(n)see zor se main,
ha(n)see sab dishaae(n),
ha(n)se lahalahaate
hare khet saare,
ha(n)see chamachamaatee
bharee dhoop pyaaree;
basantee havaa men
ha(n)see sRShTi saaree!
havaa hoo(n), havaa main
basantee havaa hoo(n)!

अलसी : Flax

चित्रकार: नूपुर अशोक

Topic: