Atma Samarpan

sajal jeevan kee siharatee dhaar par,
         lahar banakar yadi baho, to le chaloo(n).
yah n mujhase poochhanaa, main kis dishaa se aa rahaa hoo(n),
hai kahaa(n) vah charaNarekhaa, jo ki dhone jaa rahaa hoo(n),
         pattharon kee choT jab ur par lage,
         ek hee "kalakal" kaho, to le chaloo(n).
sajal jeevan kee siharatee dhaar par,
         lahar banakar yadi baho, to le chaloo(n).
maarg men tumako milenge vaat ke pratikool jhonke,
dRḌh shilaa ke khaND honge daanavon se raah roke,
         yadi prapaaton ke bhayaanak tumul men,
         bhool kar bhee bhay n ho, to le chaloo(n).
sajal jeevan kee siharatee dhaar par,
         lahar banakar yadi baho, to le chaloo(n).
ho raheen dhoomil dishaae(n), neend jaise jaagatee hai,
baadalon kee raashi maano mu(n)h banaakar bhaagatee hai,
         is badalatee prakRti ke pratibimb ko,
         muskuraakar yadi saho, to le chaloo(n).
sajal jeevan kee siharatee dhaar par,
         lahar banakar yadi baho, to le chaloo(n).
maarg se parichay naheen hai, kintu parichit shakti to hai,
door ho aaraadhy chaahe, praaN men anurakti to hai,
         in sunahalee indriyon ko prem kee,
         agni se yadi tum daho, to le chaloo(n).
sajal jeevan kee siharatee dhaar par,
         lahar banakar yadi baho, to le chaloo(n).
vah taralataa hai hRday men, kiraN ko bhee lau banaa doo(n),
jhaa(n)k le yadi ek taaraa, to use main sau banaa doo(n),
         is taralataa ke tarangit praaN men -
         praaN banakar yadi raho, to le chaloo(n).
sajal jeevan kee siharatee dhaar par,
         lahar banakar yadi baho, to le chaloo(n).