Kaarwaa Gujar Gayaa

svapn jhare phool-se,
meet chubhe shool-se,
luT gaye singaar sabhee baag़ ke babool se,
aur ham khaḌe-khaḌe bahaar dekhate rahe.
kaaravaa(n) guzar gayaa, gubaar dekhate rahe!

neend bhee khulee n thee ki haay dhoop Dhal gaee,
paa(n)v jab talak uThe ki zindagee phisal gaee,
paat-paat jhar gaye ki shaaKh-shaaKh jal gaee,
chaah to nikal sakee n, par umar nikal gaee,
geet ashk ban gae,
chhand ho daphan gae,
saath ke sabhee diai dhuaa(n) pahan-pahan gaye,
aur ham jhuke-jhuke,
moḌ par ruke-ruke
umr ke chaḌhaav kaa utaar dekhate rahe.
kaaravaa(n) guzar gayaa, gubaar dekhate rahe.

kyaa shabaab thaa ki phool-phool pyaar kar uThaa,
kyaa suroor thaa ki dekh aaeenaa sihar uThaa,
is taraph zameen uThee to aasamaan udhar uThaa,
thaam kar jigar uThaa ki jo milaa nazar uThaa,
ek din magar yahaa(n),
aisee kuchh havaa chalee,
luT gayee kalee-kalee ki ghuT gayee galee-galee,
aur ham luTe-luTe,
vakt se piTe-piTe,
saa(n)s kee sharaab kaa khumaar dekhate rahe.
kaaravaa(n) guzar gayaa, gubaar dekhate rahe.

haath the mile ki julph chaa(n)d kee sa(n)vaar doo(n),
hoTh the khule ki har bahaar ko pukaar doo(n),
dard thaa diyaa gayaa ki har dukhee ko pyaar doo(n),
aur saa(n)s yoo(n) ki svarg bhoomi par utaar doo(n),
ho sakaa n kuchh magar,
shaam ban gaee sahar,
vah uThee lahar ki dah gaye kile bikhar-bikhar,
aur ham Dare-Dare,
neer nayan men bhare,
oḌh kar kafan paḌe mazaar dekhate rahe.
kaaravaa(n) guzar gayaa, gubaar dekhate rahe!

maa(n)g bhar chalee ki ek, jab naee-naee kiran,
Dholaken dhumuk uTheen, Thumak uThe charan-charan,
shor mach gayaa ki lo chalee dulhan, chalee dulhan,
gaa(n)v sab umaḌ paḌaa, bahak uThe nayan-nayan,
par tabhee zahar bharee,
gaaj ek vah giree,
pu(n)chh gayaa sindoor taar-taar huee choonaree,
aur ham ajaan-se,
door ke makaan se,
paalakee liye hue kahaar dekhate rahe.
kaaravaa(n) guzar gayaa, gubaar dekhate rahe.

Topic: