... pratham bhaag
oo(n)che shail-shikhar ke oopar
mandir thaa visteerN vishaal;
svarN-kalash sarasij vihasit the
paakar samudit ravi-kar-jaal.
parikramaa-see kar mandir kee,
oopar se aakar jhar jhar,
vahaa(n) ek jharanaa jharataa thaa
kal kal madhur gaan kar kar.
puShp-haar-saa ja(n)chataa thaa vah
mandir ke shree charaNon men,
truTi n dikhatee thee bheetar bhee
poojaa ke upakaraNon men.
deep-doodh se aamodit thaa
mandir kaa aangan saaraa;
goo(n)j rahee thee bheetar-baahar
mukharit utsav kee dhaaraa.
bhakt-vRnd mRdu-madhur kaNTh se
gaate the sabhakti mud-may -
"patit-taariNi paap-haariNee,
maataa, teree jay-jay-jay!"
"patit-taariNee, teree jay-jay" -
mere mukh se bhee nikalaa,
binaa baḌhe hee main aage ko
jaanen kis bal se Dhikalaa!
maataa, too itanee sundar hai,
naheen jaanataa thaa main yah;
maa(n) ke paas rok bachchon kee,
kaisee vidhee yah too hee kah?
aaj svayan apane nidesh se
toone mujhe bulaayaa hai;
tabhee aaj paapee achhoot yah
shree-charaNon tak aayaa hai.
mere deep-phool lekar ve
ambaa ko arpit karake
diyaa pujaaree ne prasaad jab
aage ko anjali bharake,
bhool gayaa usakaa lenaa jhaT,
param laabh-saa paakar main.
sochaa - beTee ko maa(n) ke ye
puNy-puShp doo(n) jaakar main.
sinh paur tak bhee aangan se
naheen pahu(n)chane main paayaa,
sahasaa yah sun paḌaa ki - "kaise
yah achhoot bheetar aayaa?
pakaḌo, dekho bhaag n jaave,
banaa dhoort yah hai kaisaa;
saaph-svachchh paridhaan kiye hai,
bhale maanuShon jaisaa!
paapee ne mandir men ghusakar
kiyaa anarth baḌaa bhaaree;
kulaShit kar dee hai manidar kee
chirakaalik shuchitaa saaree."
e, kyaa meraa kaluSh baḌaa hai
devee kee garimaa se bhee;
kisee baat men hoo(n) main aage
maataa kee mahimaa se bhee?
maa(n) ke bhakt hue tum kaise,
karake yah vichaar khoTaa
maa(n) se sammukh hee maa(n) kaa tum
gaurav karate ho chhoTaa!
kuchh n sunaa bhakton ne, jhaT se
mujhe gher kar pakaḌ liyaa;
maar maar kar mukke-ghoo(n)se
dham-se neeche giraa diyaa!
mere haathon se prasaad bhee
bikhar gayaa haa! sab kaa sab,
haay! abhaagee beTee tujh tak
kaise pahu(n)ch sake yah ab.
mainne unase kahaa - daND do
mujhe maar kar, Thukaraa kar,
bas yah ek phool koee bhee
do bachchee ko le jaakar.
nyaayaalay le gaye mujhe ve
saat divas kaa daND-vidhaan
mujhako huaa; huaa thaa mujhase
devee kaa mahaan apamaan!
mainne sveekRt kiyaa daND vah
sheesh jhukaakar chup hee rah;
us aseem abhiyog, doSh kaa
kyaa uttar detaa; kyaa kah?
saat roj hee rahaa jel men
yaa ki vahaa(n) sadiyaa(n) beeteen,
avisshraant barasaa karake bhee
aa(n)khen tanik naheen reeteen.
kaidee kahate - "are moorkh, kyon
mamataa thee mandir par hee?
paas vahaa(n) masajid bhee to thee
door n thaa girijaaghar bhee."
kaise unako samajhaataa main,
vahaa(n) gayaa thaa kyaa sukh se;
devee kaa prasaad chaahaa thaa
beTee ne apane mukh se.
daND bhog kar jab main chhooTaa,
pair n uThate the ghar ko
peechhe Thel rahaa thaa koee
bhay-jarjar tanu panjar ko.
pahale kee-see lene mujhako
naheen dauḌ kar aaee vah;
ulajhee huee khel men hee haa!
abakee dee n dikhaaee vah.
use dekhane maraghaT ko hee
gayaa dauḌataa huaa vahaa(n) -
mere parichit bandhu pratham hee
phoo(n)k chuke the use jahaa(n).
bujhee paḌee thee chitaa vahaa(n) par
chhaatee dhadhak uThee meree,
haay! phool-see komal bachchee
huee raakh kee thee Dheree!
antim baar god men beTee,
tujhako le n sakaa main haay!
ek phool maa(n) kaa prasaad bhee
tujhako de n sakaa main haa!
vah prasaad dekar hee tujhako
jel n jaa sakataa thaa kyaa?
tanik Thahar hee sab janmon ke
daND n paa sakataa thaa kyaa?
beTee kee chhoTee ichchhaa vah
kaheen poorN main kar detaa
to kyaa are daiv, tribhuvan kaa
sabhee vibhav main har letaa?
yaheen chitaa par dhar doo(n)gaa main,
- koee are suno, var do -
mujhako devee ke prasaad kaa
ek phool hee laakar do!
