is basant men sakhee sunaa hai tumane
neem konpalen phooTee thee
baḌhate bachapan ke pankhon par
kaḌave sach kee chhaa(n)v tale
khud men paraayaa dard saa paale
kuchh jaagee kuchh soee thee
is basant men sakhee sunaa hai tumane
neem konpalen phooTee thee
konpal chhoTee biTiyaa jaisee
choonar men yauvan dabaae
jhukee jhukee aankhon se apane
sapane banaatee miTaatee thee
is basant men sakhee sunaa hai tumane
neem konpalen phooTee thee
pattee ne phir ons janee
heere motee see saheje usako
biTiyaa jhulasatee jeTh dhoop men
dar dar paanee bhaTakatee rahee
is basant men sakhee sunaa hai tumane
neem konpalen phooTee thee
ubhare kangooron se sajakar
davaa havaa men ghulatee rahee
neem naheen biTiyaa bhee meree
har din patajhaḌ sahatee rahee
is basant men sakhee sunaa hai tumane
neem konpalen phooTee thee
-
Antara Karvade
