Virahinee Urmila

seetaa sahit shree raam lakhan
rahane lage the jaakar van
par, urmilaa lakShmaN patnee
bechain thee mahalo me kitanee
har jagah hee dikhataa soonaapan
nahee lagataa kahee apanaapan
har svaas lakhan ko pukaaratee thee
kaise vah samay gujaaratee thee ?
bhaaree thaa usakaa har ik pal
man niraash dil me halachal
vah phoolo see nazuk kalee
chal rahee thee ab virahaa kee galee
vah pyaaree see komal kaayaa
kaisaa yah us par din aayaa
utaree nahee mehandee haatho kee
aur kho gaee need bhee raato kee
kitane hee dil me aramaa(n) lie
lakShmaN ke sang me phere lie
kismat ne kyaa upahaar die
jie, to ab vah kaise jie
vah mahalo kee shahjaadee
phoolo par chalane kee aadee
jhkaar thee ha(n)see me veeNaa kee
mahalo kaa uttam nageenaa thee
ratno se sadaa ladee rahtee
jyo gahano kee gङgaa bahatee
komal se mukh maNDal par
meeThee muskaan sadaa rahtee
par ab vah ban gaee thee jogan
virahaa me ban gaee thee rogan
n svayam ko ab vah sajaatee hai
n haar shR(n)gaar lagaatee hai
bojh lage kapaDe tan ke
kahaa(n) achche lage use ab gahane
rotee nahee piyaa ko diyaa vachan
sochatee rahatee bas man hee man
paravaah nahee hai khaane kee
sochatee hai kabhee van jaane kee
kabhee yaad kare beetee baate
sunahare din au sheetal raate
har pal use yaad sataatee hai
par nahee kisee ko bataatee hai
bas pati kaa cheharaa hee aa(n)kho me
rakh kar vah samay bitaatee hai
vah yaad kar rahee pahalaa milan
jab usako dekh rahaa thaa lakhan
aa(n)khe thee usakee jhukee huee
piyaa ke pairo par rukee huee
kyaa hee thaa vah madhur milan
jab harShit thaa dono kaa man
vidhaataa ne unhe milavaayaa thaa
sundar sa(n)yog banaayaa thaa
dono me banaa aisaa bandhan
jyo naataa khushboo aur chandan
thaa saath lakhan kaa sukhadaaee
par kaisee aa(n)dhee yah aaee ?
ek dooje se hue door
vidhaataa bhee ban gayaa thaa kroor
kyo nahee khushee se rah paaee
jis khushee se byaah kar vah aaee
kitanee man me chaah hotee thee
piyaa kee khaatir sajatee thee
piyaa khush honge usako dekhakar
kitanaa shR(n)gaar vah karatee thee
par ab to man bhee nahee maanataa
kyaa haal hai? koee bhee nahee jaanataa
andar hee ghuTatee rahtee hai
aa(n)suo ko peetee rahatee hai
piyaa basate hai usake dil me
yah soch-soch ke Daratee hai
kahee nikal n jaae(n) halachal se
is Dar se aah n bharatee hai
kabhee jaatee hai ghar ke upavan
vah bhee to ab lagataa hai van
vahaa(n) par ik kuTiyaa banaatee hai
phir pyaar se use sajaatee hai
piyaa rahate hai aisee hee kuTiyaa me
aur sote hai ghaas kee khaTiyaa pe
bas vahee pe samay gujaaratee hai
piyaa kee soorat ko nihaaratee hai
use phool nahee lagate sundar
kaa(n)Te dikhate usake andar
kaa(n)To ko dekhatee rahatee hai
har pal ahsaas yah karatee hai
kis tarah se vah chalate honge
kaa(n)Te bhee to chubhate honge
teeno hee kitane naazuk hai
kaise yah dard sahate honge?
yah soch ke nahee rah paatee hai
kabhee vah tasveer banaatee hai
seetaa ke pair lagaa kaa(n)Taa
shree raam ne usako hai thaamaa
lakShmaN vah kaa(n)Taa nikaal rahaa
bhaabee kaa pair sahalaa hee rahaa
pairo me paDe hue chhaale
koee laal to koee hai kaale
us dard ko kabhee vah likhatee hai
virahaa kee veeNaa bajatee hai
mahal nahee bhaataa usako
bagiyaa kee kuTiyaa me rahatee hai
kahaa(n) bhaate ab pakavaan use
khaane kee thee paravaah kise
gam khaatee au aa(n)su peetee hai
bas ik makasad se jeetee hai
piyaa milenge usako kabhee n kabhee
yah soch ke jindaa rahatee hai
phir se suhaag sukh bhogegee
yah soch ke maa(n)g bhee bharatee hai
piyaa kee tasveer banaatee hai
van me usako dikhaatee hai

kaise rahate hai van me piyaa
phir svayam use apanaatee hai
khaatee hai bas phal au patte
vo pake hai yaa phir hai kachche
is baat kee use paravaah nahee
is prem kee bhee koee thaah nahee
kabhee yaad kare bachapan apanaa
chaaro bahano kaa thaa sapanaa
ve rahe sadaa hee saath-saath
chaahe din yaa chaahe ho raat
vah sapanaa bhee pooraa huaa
ek hee sabako sasuraal milaa
par kahaa(n) saath deedee seetaa
jisake sang thaa har pal beetaa
jab kabhee vaaTikaa me jaatee
phool siyaa ko dikhalaatee
kaa(n)Te n haath me chubh jaae(n)
yah soch ke peechhe haT jaatee
chal rahee hogee shoolo pe siyaa
jisane jeevan mahalo me jiyaa
jisake aage peechhe daasee
ban gaee hai aaj vah vanavaasee
jo pahanatee reshamee vastr
aaj pahanatee keval valkal
dekh ke chitr me jaanavar
man hee man jo jaatee thee Dar
vahee jangal me ab rahtee hai
jaane vah kaise sahatee hai
jo makhamal par sotee thee
jamee par kadam n dharatee thee
vah chalatee hai ab shoolo par
aur sotee hai teelo par
kismat kaa khel niraalaa hai
kahaa(n) koee samajhane vaalaa hai
urmilaa kee soch gaharaa hee rahee
sudh-budh apanee vah kho hee rahee
kabhee sochatee hai man me
vah bhee chalee jaae ab van me
jaakar vah piyaa se mil aae
virah kee peeDaa batalaae
jee bhar ke dekhegee piyaa ko
tabhee samajhaa paaegee jiyaa ko
dooje hee kShaN yah sochatee hai
aur svayam ko rokatee hai
piyaa to karam me ab rat hai
kyo mujhame aayaa svaarth hai
nahee karam me baadhaa ban sakatee
piyaa ko vichalit nahee kar sakatee
keval apane svaarth ke lie
piyaa path kaa patthar n ban sakatee
phir sochatee hai van me jaaoo(n)
piyaa ko bas dekh ke aa jaaoo(n)
door se dekhoo(n)gee piyaa ko
samajhaa loo(n)gee is jiyaa ko
piyaa jaae(n)ge jis path par
vahee par baiThoo(n)gee mai chhupakar
us dhool ko mai uThaa loo(n)gee
aur maa(n)g me apanee sajaa loo(n)gee
maathe pe lagaa ke charaN raj
dulhan kee see mai jaaoo(n)gee saj
kabhee sochatee hai vahaa(n) par jaae
us path ke kaa(n)Te chun laae
jis path se piyaa gujarate hai
na(n)ge hee paa(n)vo chalate hai
us path pe phool bichhaa aae
piyaa ke darshan bhee kar aae
jaa ke deedee kee sevaa kare
usakaa bhee kuchh dukh door kare
rahakar vah bhee piyaa ke saath
sevaa me ba(n)Taaegee usakaa haath
nahee vah kuchh kisee se bolegee
ik kone me baiThee rahegee
vah daasee banakar hee rahegee
aur sabakee sevaa karegee
piyaa ke bhee charaN dabaaegee
tabhee to khush rah paaegee
saare kaShTo ko sah loo(n)gee
par , piyaa ke saath rahoo(n)gee
kabhee sakhee ko apanee bataatee hai
virah kee peeDaa sunaatee hai
aa(n)kho me to aa(n)su nahee aate
besudh ho kar gir jaatee hai

svayam ko samajhaatee hai kabhee
urmilaa nahee Dolegee abhee
piyaa ke lie vah rahegee jindaa
nahee virahaa ban sakataa phandaa
kabhee n kabhee to milege ham
tab tak to mai rakhoo(n)gee dam
mai piyaa kee raah nihaaru(n)gee
usake lie khud ko sa(n)vaarugee
kabhee dil me dhaDakan baDh jaatee
yah soch soch ke ghabaraatee
kaise beetege chaudah varSh
kyaa kabhee hogaa jeevan me harSh
kabhee sapane me hee Dar jaatee
bhaavukataa se bhar jaatee
par vah to kuchh nahee kar sakatee
n jindaa hai n hee mar sakatee
nahee beete samay bitaane se
yoo(n) har pal ghabaraane se
lagataa vakt jaise tham saa gayaa
soory kaa rath jaise ruk saa gayaa
raat me cha(n)daa ko dekhatee
aur kabhee usase yah poochhatee
tum mere piyaa ko dekh rahe
to bolo ! vah kyaa kar rahe?
kabhee yaad mujhe ve karate hai
mere lie aahe bharate hai
kyaa vah bhee tumako dekhate hai?
kabhee mere lie bhee poochhate hai?
mere piyaa ko yah bataa denaa
aur achchhe se samajhaa denaa
jindaa hai abhee usakee urmilaa
mujhe nahee hai usase koee gilaa
mai jaisee bhee hoo(n) rah loo(n)gee
virahaa kee peeDaa sah loo(n)gee
par apanaa karam tum chhoDanaa nahee
praN liyaa jo tumane vah toDanaa nahee
meree paravaah nahee karanaa
sevaa kee raah nahee tajanaa
nahee beech path me ghabaraa jaanaa
nahee chhoD ke unako aa jaanaa
shree raam siyaa ko teraa saath
chaahie ! bano unakaa doojaa haath
kabhee man me mail nahee laanaa
n dilavaanaa koee ulaahanaa
kabhee bolatee urmi taaro se
jaao tum sab van me jaao
jgal kee kaalee raato me
piyaa ke path par tum bichh jaao
siyaa raam to so hee rahe hoge
piyaa baahar hee baiThe hoge
vah mere lie sochate hoge
man me baate karate hoge
jaa ke tum unako samajhaa do
aur meree taraph se batalaa do
kabhee beet jaae(n)ge chaudah saal
nahee laae(n) man me koee malaal
har subah dekhatee soory kiraN
meree taraph se chhoo do piyaa ke charaN
kabhee pakShiyo se karatee baate
n din hee n beete raate
kahatee pakShiyo se! he pakSheegaN
uD kar jaao tum us van
jahaa par rahate hai piyaa lakhan
jaao unhe n ho koee ulajhan
meraa sandes bataa denaa
koee pyaar kaa geet sunaa denaa
jo sun kar vah khush ho jaae(n)
kuchh samay to man ko bahlalaae(n)
kabhee aataa hai usake man me
piyaa rahate hue hee yoo(n) van me
mujhako to bhool gae hoge
kabhee yaad bhee nahee karate hoge
dooje hee kShaN yah vichaar kare
aur svayam kaa hee bahiShkaar kare
aisaa to kabhee nahee ho sakataa
mujhako nahee kabhee bhulaa sakataa
vah pharz ke haatho ba(n)dhaa hai abhee
par milege mujhase kabhee n kabhee
kabhee to ho jaaegaa milan
man me thee ik aashaa kee kiran
likhatee hai kabhee prem paatee
phir khud hee use jalaa detee
kabhee doot ko vah bulaatee hai
usako sandesh sunaatee hai
phir svayam hee use rok detee
aur kabhee us se poochhatee
tum to use milate rahate ho
saare sandesh jaa kahate ho
bolo kabhee piyaa ne kee hai baat
kaise kaTate hai din au raat
kabhee meraa naam vo lete hai
kyaa koee sandesh vo dete hai?
socho me rahatee thee gum - sum
aa(n)kho me base the piyaa haradam
man mandir me piyaa ko basaae hue
usee kee yaado me samaae hue
rahee kaaT samay jaise taise
bas virahaa me rahatee aise
dhany vah bhaarat kee naaree
jisane apanee hee khushee vaaree
kahe kaise us naaree kee taDap
kahane ke lie nahee koee shabd
bas vah virahaa me jalatee rahee
intzaar piyaa kaa karatee rahee

Seema Sachdeva
Email: [email protected]