main apane
is tuchchh ekaakeepan se hee
itanaa vichalit ho jaataa hoo(n)
to saagar!
tum apanaa yah viraaT akelaapan
kaise jhelate ho?
samay ke antaheen chhoron men
is kShitij se us kShitij tak
yah saa(n)-saa(n) karataa huaa
phuphakaarataa sannaaTaa -
yugon kee uḌatee dhool men
antaheen registaan kaa
nipaT ekaakee safar -
sadiyon se jaagatee
khulee huee aa(n)khon men
maheen ret-see kirakiraatee
aseem prateekShaa!
- sachamuch
saagar, tumhen yon
akelaa chhoḌ kar jaane kaa
man naheen hotaa
lekin tumhaare paas rah kar bhee
kyaa koee
tumhaare akelepan ko baa(n)T sakataa hai?
vah kaun hai
jo anaadi se anant tak
tumhaaraa haath thaame chal sake,
gahare niःshvaason ke saath
uThate-girate tumhaare vakSh ko sahalaaye?
kis ke kaan
tumhaaree dhaḌakanon ko sun sakenge,
kaun se haath
tumhaare maathe par paḌee
dard kee salavaTon ko haTaayenge
yaa bikhare hue baalon ko
sa(n)vaarane kaa saahas juTaa paayenge?
kis kaa agaadh pyaar
tumhaare ekaakeepan ko bhee bhigo paayegaa?
mujhe to lagataa hai
o saagar,
akelaa honaa
har viraaT kee niyati hai.
vah ek se anek hone kee
kitanee hee cheShTaa kare
apanee hee maayaa se, leelaa se,
laharaatee laharon se
khud ko bahalaaye
par anantः rahataa ekaakee hai.
- phir bhee
tumhen chhoḌ kar jaate hue
man kuchh udaas huaa jaataa hai -
(shaayad yahee moh hai, shaayad yahee ahan hai!)
- tumhaare paas
ek ajanabee-see
pahachaan liye aayaa thaa
ek viraaT akelepan kaa
ek akinchan-saa kaN le kar jaa rahaa hoo(n)!
-
Kuljeet
