teree koshish, chup ho jaanaa,
meree zid hai, shankh bajaanaa ...
ye jo soye, unakee needen
seemaa se bhee jyaadaa gaharee
ab tak jaag naheen paaye ve
sar tak hai aa gaee dupaharee;
kab se unhen, pukaar rahaa hoo(n)
tum bhee kuchh, aavaaz milaanaa...
taT kee gheraabandee karake
baiThe hain saare ke saare,
koee machhalee chhooT n jaaye
isee daa(n)v men hain machhuaare.....
main unako lalakaar rahaa hoo(n),
tum jaldee se jaal haTaanaa.....
ye jo galat dishaa anugaamee
dauḌ rahe hain, andhee dauḌen,
achchhaa ho ki himmat karake
ham inakee haThadharmee toḌen.....
main aage se rok rahaa hoo(n) -
tum peechhe se haa(n)k lagaanaa ....
-
Krishna Bakshi
