Kavita Ummeed Se Hai

kalam, likhanaa chaahatee hai 'bachchiyaan'
kavitaa khilakhilaanaa chaahatee hai
maasoom cheekhon kaa shor
machaa detaa hai uthal puthal
kaa(n)pane lagataa hai kalam kaa tan badan
kavitaa rone lag jaatee hai ...

kalam, likhanaa chaahatee hai 'prakRti'
kavitaa aanandamagn honaa chaahatee hai
jaane kahaa(n) se ghus aataa hai kalam men
hOrn bajaatee moTar gaaḌiyon kaa dhuaan
dam ghuTane lagataa hai kalam kaa
kavitaa dharaashaayee ho jaatee hai ...

kalam, likhanaa chaahatee hai 'prem'
kavitaa jhoom jhoom ke naachanaa chaahatee hai
har akShar par badalane lagataa hai
syaahee kaa rang
kalam kuchh or hee likhavaanaa chaahatee hai
kavitaa maun ho jaatee hai ...

kalam, likhanaa chaahatee hai 'maataa-pitaa'
kavitaa shabdon ko dulaaranaa chaahatee hai
shabd juḌate naheen bikharane lagate hain
kaagaj par paḌ jaatee hain
sainkaḌon jhurriyaan
kalam Dagamagaane lagatee hai
kavitaa saham jaatee hai ...

kalam, likhanaa chaahatee hai 'stree'
kavitaa uḌanaa chaahatee hai
kalam ke pairon men paḌ jaatee hai janjeer
kaalee syaahee badal jaatee hai saphed paauDar men
kavitaa phaḌaphaḌaa ke rah jaatee hai ...

kavitaa ummeed se hai
magar paḌee hai adhooree aur udaas
koee bataaye use phool zaroor khilegaa
jab tak rahegee aas.

Parul 'Pankhuri'
Email : [email protected]

Topic: