chhoTe the, maa(n) upale thaapaa karatee thee
ham upalon par shaklen goo(n)dhaa karate the
aa(n)kh lagaakar - kaan banaakar
naak sajaakar -
pagaḌee vaalaa, Topee vaalaa
meraa upalaa -
teraa upalaa -
apane-apane jaane-pahachaane naamon se
upale thaapaa karate the
ha(n)sataa-khelataa sooraj roz savere aakar
gobar ke upalon pe khelaa karataa thaa
raat ko aa(n)gan men jab choolhaa jalataa thaa
ham saare choolhaa gher ke baiThe rahate the
kis upale kee baaree aayee
kisakaa upalaa raakh huaa
vo panDit thaa -
ik munnaa thaa -
ik dasharath thaa -
barason baad - main
shmashaan men baiThaa soch rahaa hoo(n)
aaj kee raat is vakt ke jalate choolhe men
ik dost kaa upalaa aur gayaa!
-
Gulzar
