saa(n)jh Dhale main aashaaon ke deep jalaayaa karataa hoo(n)..
thaam ujaale kaa daaman
man ne kuchh sapane dekhe the,
kuchh kaliyon kee seepon men
kuchh motee puShp sareekhe the,
man uḌ baiThaa thaa panchhee saa
toḌ samajh kee har beḌee,
aashaaon kee madiraa se
amRt ke pyaale feeke the,
us chhor sabhee jo dekhe the vah dRshy banaayaa karataa hoo(n)
saa(n)jh Dhale main aashaaon ke deep jalaayaa karataa hoo(n)..
dhoop baḌhee phir
svapn sej kee su(n)darataa mujhase rooThee,
raahon kaa har kaa(n)Taa bolaa
"kaTutaa sachchee madhutaa jhooThee"
man bol uThaa baiThe rahane se kab sukh kisane paayaa hai,
ha(n)see ThiTholee karataa sukh usane yah svaa(n)g rachaayaa hai,
har pal tan kee peeḌaa sehataa main harSh manaayaa karataa hoo(n)
saa(n)jh Dhale main aashaaon ke deep jalaayaa karataa hoo(n)..
kuchh door main shaayad chal baiThaa
ab door vah sapane dikhate hain,
vRd ujaalaa sehamaa saa
sa(n)dhyaa ke aarohee saa(n)sen bharaten hain,
kuchh rahee adhooree aashaayen phir bhee main chalataa rahataa hoo(n)
man ke kalpit svapanon kaa svar is path ko arpit karataa hoo(n),
jis pahar ujaalaa sotaa hai main aas jagaayaa karataa hoo(n)
saa(n)jh Dhale main aashaaon ke deep jalaayaa karataa hoo(n)...
-
Parimal Srivastava
