jis raat
a(n)dheraa gaharaataa hai
chaa(n)danee pighalatee hai
main haule kadamon se
kainavas kee kaid se
baahar nikalatee hoo(n)
baalon ko jhaTak kar kholatee hoo(n)
aur un ghaneree zulphon men
Taa(n)katee hoo(n) jagamagaate sitaare
mere badan se phooTatee hai khushboo
hazaaron cha(n)paee phool khilate hain
aa(n)khon ke koron se koee
sahejaa huaa sapanaa
Tapak jaataa hai
madahosh havaa men
anajaanee dhun par
anajaanee lay se
pair thirak jaate hain
raat bhar main jhoomatee hoo(n)
pau phaTate hee
baalon ko sameTtee hoo(n)
jooDe men...
badan kee khushaboo ko Dhankatee hoo(n)
chaadar se
palakon ko jhapakaatee hoo(n)
aur koee adhooraa sapanaa
phir kaid ho jaataa hai
aa(n)khon men
ek kadam aage baDhaatee hoo(n)
aur kainavas kee tasveer vaalee
laDakee ban jaatee hoo(n)
tum aate ho
tasveer ke aage ThiThakate ho
do pal
phir doosaree tasveer kee or
baDh jaate ho..
mere honTh bebas, kaid hain
kainavas men
bolanaa chaahatee hoo(n)..par..
kyaa tum naheen dekh paate
tasveer kee laDakee ke
honThon kee zaraa see TeDhee
muskuraahaT
aur neeche saphed pharsh par
gire do cha(n)paee phool ??
-
Pratyaksha
