Receive exquisite poems.

Meree Kavitaayein

Iraq me(n) bam phaTane ke kuchh ghanTon baad ek cello vaadak ne vidhvansataa ke beech baiTh apane sangeet kaa saundary phailaa aatank aur naash kaa saamanaa kiyaa. pratikool vaataavaraN men bhee saundary hee rachane kaa sankalp, kyonki saundary kee apanee ek dard nivaaraN shakti hotee hai.

sochaa thaa mai(n)ne
ab naheen likhoo(n)gaa kavitaae(n)
TooTan kee, ghuTan kee
laavaaris aa(n)khon ke sapanon kee
saamaajik vivashataaon kee
jalatee huee hasaraton kee
bujhate hue vishvaas kee
ab naheen likhoo(n)gaa kavitaae(n) .
chunoo(n)gaa shabd vyom se,
prakRti se, saagar se, taru se, maru se
sooraj ke gaa(n)v baiTh
gaDhoogaa(n)----
manohaaree meha(n)dee-rache shabd-chitr
chaa(n)d kee sheetalataa se yukt
jeevan saundary kee paribhaaShaae(n)
vaisee hee hogee meree kavitaae(n) .
aakaash men umaḌate-ghumaḌate
kaale-kaale baadal
kaundhatee bijaliyaa(n)
nav yugal ke komal tan par
rimajhim giratee phuhaaren
taru kee Daalee men ugate nae komal konpal
halke jaaḌe kee madhur siharan
dhu(n)dh chhaTe din men
chiḌiyon kaa neeche utar
daanaa chuganaa,
garmee ke dinon men
samundar men nahaanaa
kitanee jeevant hongee ye kavitaae(n)
aisee hee hogee meree kavitaae(n) .
bhaavanaae(n) aatur ho chalee
lagaa main mausam ko badal doo(n)gaa
man par lag rahee
avishvaas, anaitikataa aur
svaarthaparataa kee kaaee ko
khurach-khurach kar door kar doo(n)gaa
mavaad bhare jakhmon par
ThanDhe chandan kaa lep doo(n)gaa
thaap aur taal par
naachegaa yauvan
sur ke aagosh men ;
phudak-phudak gauraiye-saa
jan-man ko aahlaadit karengee meree kavitaae(n)
janahitaay hogee meree kavitaae(n) |
kintu kahaa(n) ?
TooTatee hee jaa rahee
vishvaas se ghaniShTataa
hai haadason aur dangon se bharee
khabar sunane kee vivashataa
banTatee jaageer hee naheen
pyaar bhee hai ba(n)T rahaa
vah aa(n)soo naheen khoon thaa
peetee jo rahee hai maa(n) kee mamataa
baarood kee gandh men baiThakar
cheekhon aur ghabaraahaTo ke beech
kaise likhee jaa sakengee
komal-sparsh kee kavitaae(n) ?
alagaav, aatank, ghoTaalaa
kShat-vikShat pahachaan aur daman kaa bolabaalaa ;
baḌhaae(n)gee sisakatee shaktiyon kaa hausalaa
chhoTe se hRday men
pyaar ke kuchh shabd lekar
dvaar-dvaar ghoomengee meree kavitaae(n)
haa(n), vaisee hee hogee meree kavitaae(n) |
- Gopal Gunjan
Gopal Gunjan: [email protected]
Topic:
Hope Faith (18)
Society (31)

काव्यालय पर प्रकाशित: 2 Sep 2016

***
Donate
A peaceful house of the beauty and solace of Hindi poetry, free from the noise of advertisements... to keep Kaavyaalaya like this, please donate.

₹ 500
₹ 250
Another Amount
This Month :
'Kuchh Prem Kavitaayein'
Pradeep Shukla


1.
prem kavitaa, kahaaniyaa(n) aur ph़ilmen
jahaa(n) tak le jaa sakatee hain
main gayaa hoo(n) usake paar
kaee baar.
ik ajeeb-see bechainee hotee hai vahaa(n)
jee karataa hai thaam loo(n) koee cheej
koee haath, koee sahaaraa.
main Tik naheen paataa vahaa(n) der tak.

suno,
abase
..

Read and listen here...
This Month :
'Swatantrataa Kaa Deepak'
Gopalsingh Nepali


ghor andhakaar ho, chal rahee bayaar ho,
aaj dvaar dvaar par yah diyaa bujhe naheen.
yah nisheeth kaa diyaa laa rahaa vihaan hai.

shakti kaa diyaa huaa, shakti ko diyaa huaa,
bhakti se diyaa huaa, yah svatantrataadiyaa,
ruk rahee n naav ho, zor kaa bahaav ho,
      aaj gangadhaar par yah diyaa bujhe naheen!
      yah svadesh kaa diyaa praaN ke samaan hai!
..

Read more here...
This Month :
'Yuddh Kee Vibheeshikaa'
Gajendra Singh


yuddh agar anivaary hai socho samaraangaN kaa kyaa hogaa?
aise hee chalataa rahaa samar to naee phasal kaa kyaa hogaa?

har or dhue(n) ke baadal hain, har or aag ye phailee hai.
bachapan kee aa(n)khen bhayaakraant, khaNDahar ghar, dharatee mailee hai.
chhaayaa nabh men kaalaa patajhaḌ, kho gayaa kahaa(n) neelaa manjar?
jharanon kaa gaanaa thaa kal tak, par aaj maut kee railee hai.

kilakaaree bharate ..

Read and listen here...
random post | poem sections: shilaadhaar yugavaaNee nav-kusum kaavya-setu | pratidhwani | kaavya-lekh
contact us | about us
Donate

a  MANASKRITI  website