Is Nashwar Sansaar Mein

sirf dukh naheen jaataa
sukh bhee chalaa jaataa hai
yahaa(n) rahane kaun aayaa hai

sirf ghRNaa naheen haaratee
prem bhee haar jaataa hai

sansaar men sabase dukhabharee hotee hai prem kee haar
tab prem sirf kavitaaon aur kahaaniyon men
bachaa rah jaataa hai

yahee bachaa huaa prem
hamaaree aa(n)khon men namee banaaye rakhataa hai

sirf roshanee naheen aatee
andheraa bhee aataa hai apanee pooree sundarataa ke saath
andhere aur roshanee men ek hee shvaas dhaḌakatee hai
ye naheen rah sakate ek-doosare ke binaa

koee bhalaa kaise alag kar sakataa hai
raat ko din aur subah ko shaam se
ye sansaar ke sabase puraane premee hain

sirf gyaan naheen jeetataa
agyaan bhee jeet jaataa hai
agyaan kee jeet manuShyataa kee haar hai

gyaanee de yaa n de, kuchh chheenataa naheen
agyaanee se milataa kuchh bhee naheen
sab kuchh chhin jaataa hai

is nashvar sansaar men
jahaa(n) kuchh bhee bachaanaa mushkil hai
agar bachaa len ham thoḌaa saa sukh
baTor len thoḌaa saa prem
nahaa len thoḌee see roshanee men
gyaan hamen bhingo de, thoḌaa hee sahee
to bahut kuchh khokar bhee
sab kuchh bach jaataa hai

Topic: